الرئيسية
السلام عليكم ورحمة الله وبركاته ...
جلس ذلك الرجل على السرير الابيض .. في احدى المستشفيات وكان كل جسمه شاش (ورجلينه يعني .. قدميه ) كلها جبس وما تسمع الا .:. آه .. وأوه .. وآي .:. وهو مغير ( يون يعني . يتألم ) من الاوجاع اللي فيه .
عاد انا قلت : يمكن انه مسوي حادث قوي او انه محترق او او او ... الخ ..
المهم جت الساعه 4 العصر وبدا وقت الزيارة . انا استغربت من شي غرييييب كل من جاء يزور هالشخص يطلع من عنده ميت من الضحك .
انا جاني الفضول وقلت وش السالفه ياولد ... وعلى هالحال كل من جاء وسلم عليه ما تسمع الا ضحكهم من ورا الستاير . .عاد انا قلت لازم اعرف وش السالفه .. لقاااافه ..
انتهى وقت الزيارة .. ( وانقز له يعني .. ذهبت إليه ) على طول ( واتشافا له يعني .. ادعو له بالشفاء ) واقول له الحمد لله على السلامه عسى ماشر ومن هالكلام .. وانا كل همي اعرف ليش يضحكون ..
المهم قلت له : انا اشوف اللي يجونك ما يرحون من عندك الا وضحكهم واصل اخر المستشفى ...
قال لي : هههههههههه ليـش عاد أنت حاسدنا على الضحك ...
قلت له: لا يا أخوي مب القد ولاكذا السالفه .. والله لو عندك مليون كان يمكن أحسدك! ...
بس اضحكوا عادي خذوا راحتهم بس بغيت اعرف السر يعني ... اذا ما عندك مانع ...
قال لي : طيـب ولا يهمك ... انت مثل ما تشوفني مكسر ومربط بالشاش ..
قلت له : إيه .. والله ... الله يشفيك ..
قال لي : يا طويل العمر انا ساكن في شقه في الدور الثاني ... وعندي بلكونه ( مامن زينها يعني .. لكم عليها )... واذا نمت فتحت باب البلكونه .. وطفيت النور ... وتسدحت على السرير ...
ويوم من الأيام نمت على السرير ... وغصت في اعماق اعماق نومي ... حلمت اني في يوم القيامة ... وحلمت مثل ما تقول ان الناس في مكان مثل موقف الباصات وفيه باصات رايحه للجنة وباصات رايحه للنار !!! ....
المهم الجماعه ينادون بالاسامي .. فلان بن فلانه باص النار ... فلان بن فلانه باص الجنة .. وهكذا ..
المهم ( ماوعيت يعني .. انتبهت ) إلا وهم يقولون .. فلان بن فلانه ...هه هذا اسمي ... وقلبي يـدق ويدق...
رووح باص الجنة .... اووووووووو وووه الحمد لله ارتحت ..
ومشيـت ادور على الباص اللي مكتوب عليه الى الجنة ... وحصلته ودخلت فيه ... مشيـنا بالباص وبعد فترة جاتنا لوحه مكتوب عليها (الجنة 50 كيلوا) (النار 100 كيلوا )وهذا وحنا مع اللوحات .. والله ونتعدى الجنة ...
قلت في نفسي : يمكن السواق يـعرف مكان لباب ثاني ..
شوي إلا واشوف ( النار 15 كيلو ) ... وبعد شوي ( النار 10 كيلو ) ... وكل شوي نقرب من النار ... يا رجال وش السالفه .. المشكله الناس ساكتيـن وما حد قلق في الباص الا انا .....
قلت برووح للسواق واشوف وش السالفة .. شفته معطيني ظهره .. قلت له : هيه هيه أنت وين رايح ؟؟؟!!!! ...
قال لي بدون ما يلتفت : رايح النار يا حبيبي .....
قلت له : ويـش انا من اهل الجنة .. وليـش توديني النار يا وجه النحس !!!....
والتفت لي ... طلع هو ابليس !!! ..
الله يهلكك ... انا من اهل الجنة .. ياشرير لا توديني النار .. انا من اهل الجنة .... والله العظيم اني من اهل الجنة ...
تو من شوي قايلين اسمي ... وقف ياحقير .. وقف ياشرير ... وهذا انا أصرخ... وهو بانواع الضحكات الشريره هاهاهاهاها ... هاهاهاها . ..
قلت له ياحقير وقف !!! أبي انزل !!! ...
قال : والله الباص هذا مبرمج على انه ما يوقف الا في النار ... تبي تنزل أقفز منه .... وركضت على الباب وفتحته ... وهوووووووو ووووب ولا ( وعيت بمعنى أستيقضت ) إلا وأنا في المستشفى ...
( أثري بمعنى .. أتاريني ) قافز من البلكونه ... في الحوش ..
